കടലിൽ പൊങ്ങിക്കിടക്കും, കാറ്റിലും തിരയിലും അതിവേഗം സഞ്ചരിക്കും; തീപിടിത്ത സാധ്യത കൂടുതൽ; കടൽജീവികൾ നശിക്കും: എന്താണ് മറൈൻ ഗ്യാസ് ഓയിൽ?

• എംഎസ്‌സി എൽസ എന്ന ഫീഡർ കപ്പൽ 26 ഡിഗ്രി ചെരിഞ്ഞ നിലയിലാണുള്ളത്.
• കടലിൽ വീണ കണ്ടൈനറുകളിൽ മറൈൻ ഗ്യാസ് ഓയിൽ വെരി ലോ സൾഫർ ഫ്യൂവൽ ഓയിൽ എന്നിവയാണുള്ളത്.
• കപ്പൽ ചെരിഞ്ഞ സാഹചര്യം ഇപ്പോഴും അവ്യക്തമാണ്

കൊച്ചി: വിഴിഞ്ഞം തുറമുഖത്ത് നിന്ന് കൊച്ചിയിലേക്കുള്ള യാത്രക്കിടെ എംഎസ്‌സി എൽസ എന്ന ഫീഡർ കപ്പൽ അപകടത്തിൽ പെട്ടിരിക്കുകയാണ്. കപ്പൽ 26 ഡിഗ്രി ചെരിഞ്ഞ നിലയിലാണ് ഇപ്പോഴുള്ളത്. കപ്പലിലെ 24 ജീവനക്കാരെയും രക്ഷപ്പെടുത്തിയിട്ടുണ്ട്. മുങ്ങിയിട്ടില്ല എന്നതിനാൽ കപ്പലിന്റെ നിയന്ത്രണത്തിനായി മൂന്ന് പേർ അതിൽ തുടരുന്നുണ്ട്. അതെസമയം കപ്പലിൽ നിന്ന് കടലിൽ വീണ കണ്ടൈനറുകൾ ആശങ്ക പടർത്തുകയാണ്. ഈ കണ്ടൈനറുകളിലുള്ളത് മറൈൻ ഗ്യാസ് ഓയിലും (എംജിഒ) വെരി ലോ സൾഫർ ഫ്യൂവൽ ഓയിലും (വിഎൽഎസ്എഫ്ഒ) ആണ്.

എന്താണ് ഓയിലുകൾ?

മറൈൻ ഗ്യാസ് ഓയിൽ പ്രധാനമായും ചെറിയ കപ്പലുകളിലും തീരദേശ കപ്പലുകളിലും ഉപയോഗിക്കുന്ന ഒരു തരം ഡീസൽ ഇന്ധനമാണ്. ഹെവി ഫ്യുവൽ ഓയിലുകളേക്കാൾ ഭാരം കുറഞ്ഞതും ശുദ്ധവുമാണ് ഇവ. വളരെയേറെ ശുദ്ധീകരിക്കപ്പെട്ടവയാണെങ്കിലും ഈ ഓയിൽ കടലിൽ പരന്നാൽ കടൽജീവികൾക്ക് വലിയ ദോഷമുണ്ടാകും. MGO-യിൽ ബെൻസീൻ, ടോലുയിൻ, സൈലീൻ തുടങ്ങിയ ആരോമാറ്റിക് ഹൈഡ്രോകാർബണുകൾ അടങ്ങിയിട്ടുണ്ട്. ഇവ സമുദ്രജീവികളെ സംബന്ധിച്ച് വിഷകരമാണ്.

കട്ടിയുള്ളതും പശിമയുള്ളതുമായ അസംസ്കൃത എണ്ണയിൽ നിന്ന് വ്യത്യസ്തമായി മറൈൻ ഗ്യാസ് ഓയില്‍ കട്ടി കുറഞ്ഞതും വളരെ വിസ്കോസിറ്റി കുറഞ്ഞതുമാണ്. ദ്രാവകത്തിൽ രൂപമാറ്റം വരുത്തുന്നതിനെതിരെ ആ ദ്രാവകം പ്രയോഗിക്കുന്ന ഒരു പ്രതിരോധമുണ്ട്. ഇതാണ് വിസ്കോസിറ്റി. മറൈൻ ഗ്യാസ് ഓയിൽ വിസ്കോസിറ്റി വളരെ കുറഞ്ഞ ഒന്നാണ്. ഇക്കാരണത്താൽ അതിവേഗത്തിലായിരിക്കും കടലിൽ ഈ എണ്ണ പരക്കുക. ഉപരിതലത്തിൽ ഈ എണ്ണ ദീർഘമായി തങ്ങി നിൽക്കുകയും കാറ്റിലും തിരയിലും അതിവേഗം മറ്റിടങ്ങളിലേക്ക് സഞ്ചരിക്കുകയും ചെയ്യും. വല്ലാതെ ലീക്കായാൽ കേരള തീരത്തേക്ക് ഈ എണ്ണ എത്താനുള്ള സാധ്യത വളരെ കൂടുതലാണ്. കുറെ നാളത്തേക്ക് മത്സ്യത്തൊഴിലാളികളുടെ ജീവിതം മുട്ടിക്കാൻ വരെ ഈ എണ്ണയ്ക്ക് സാധിക്കും.

2020 മുതൽ നടപ്പിലാക്കിയ ആഗോള പാരിസ്ഥിതിക നിയന്ത്രണങ്ങൾക്ക് അനുസൃതമായി സൾഫറിന്റെ അളവ് 0.5% ആയി പരിമിതപ്പെടുത്തിയ ഒരു സമുദ്ര ഇന്ധനമാണ് VLSFO അഥവാ വെരി ലോ സൾഫർ ഫ്യൂവൽ ഓയിൽ (Very Low Sulfur Fuel Oil). ഗ്ലോബൽ സൾഫർ ക്യാപ് എന്നറിയപ്പെടുന്ന പാരിസ്ഥിതിക നിയന്ത്രണം പാലിക്കുന്ന തരം ഇന്ധനമാണിത്. കപ്പലുകളിൽ നിന്നുള്ള വായു മലിനീകരണം കുറയ്ക്കുന്നതിന് ഈ എണ്ണയിലെ സൾഫർ സാന്നിധ്യം 0.5 ശതമാനം ആയി കുറച്ചു. പണ്ടത്തേതിനെക്കാൾ വിഷാംശം VLSFO-യിൽ ഇന്ന് കുറവാണ്. പക്ഷേ കടലിലേക്ക് ഒഴുകിയാൽ സമുദ്ര ആവാസവ്യവസ്ഥയ്ക്ക് അപകടം തന്നെയാണിത്.

ഈ രണ്ട് എണ്ണയും തീപ്പിടിത്തത്തിന് വഴിയൊരുക്കും എന്ന അപകടം എപ്പോഴും നിലനിൽക്കുന്നു. ഇക്കാരണത്താലാണ് കണ്ടൈനർ തീരത്തേക്ക് അടുക്കുകയാണെങ്കിൽ അടുത്തേക്ക് പോകരുതെന്ന് ജാഗ്രതാ നിർദ്ദേശം നല്‍കിയിരിക്കുന്നത്. കപ്പൽ ചെരിയാനുണ്ടായ സാഹചര്യം അറിവായിട്ടില്ല. ചുഴിയിൽ പെട്ട് ചെരിഞ്ഞതാണെന്നാണ് നിലവിലെ അനുമാനം.