വില 50 രൂപയിൽ താഴെ; വൻകിട നിക്ഷേപകർ ഒരുപോലെ സ്വന്തമാക്കുന്ന 3 പൊതുമേഖല ബാങ്ക് ഓഹരികൾ

• വൻകിട നിക്ഷേപകരുടെ പങ്കാളിത്തം നിർണായകം.
• എഫ്ഐഐ/ ഡിഐഐ വിഹിതം ഉയർത്തിയ ഓഹരികൾ.
• ഈ വർഷം ഇതുവരെയായി ഗണ്യമായ തിരുത്തൽ നേരിട്ടു.

താരതമ്യേന വിപണി വില കുറവുള്ള ഓഹരികളോട് റീട്ടെയിൽ നിക്ഷേപകർക്കിടയിൽ ആഭിമുഖ്യം കൂടതലാണ്. കുറഞ്ഞ തുകയിൽ കൂടുതൽ എണ്ണം ഓഹരികൾ വാങ്ങാമെന്നതും അതുവഴി ഭാവിയിൽ വലിയ നേട്ടം സ്വന്താമാക്കാൻ കഴിയുമെന്ന പ്രതീക്ഷയുമാണ് 50 രൂപയിൽ താഴെയുള്ള ഓഹരികളിലേക്ക് നിക്ഷേപക ശ്രദ്ധ വലിച്ചടുപ്പിക്കുന്നത്. സാധാരണഗതിയിൽ 50 രൂപയിൽ താഴെ വിപണി വിലയുള്ള ഓഹരികളെ പെന്നി സ്റ്റോക്കുകളായി വിശേഷിപ്പിക്കാറുണ്ടെങ്കിലും ഇവിടെ പങ്കുവെക്കാൻ ഉദ്ദേശിച്ചിരിക്കുന്ന മൂന്ന് പൊതുമേഖല ബാങ്ക് ഓഹരികളേയും പൂർണമായും ആ ഗണത്തിൽ ഉൾപ്പെടുത്താനാകില്ല.

മാർക്കറ്റ് ക്യാപ്, ബിസിനസ് വോളിയം, ഷെയർഹോൾഡിങ് പാറ്റേൺ ഒക്കെ അടിസ്ഥാനമാക്കിയാൽ വിപണി വില 50 രൂപയിൽ താഴെയാണെങ്കിലും മുൻനിര ഓഹരികളാണിത്. അടുത്തിടെയായി വിദേശ നിക്ഷേപക സ്ഥാപനങ്ങളും (എഫ്ഐഐ) ആഭ്യന്തര നിക്ഷേപക സ്ഥാപനങ്ങളും (ഡിഐഐ) ഒരുപോലെ വാങ്ങിക്കൂട്ടുന്ന ഓഹരികളായതു കൊണ്ടാണ് ഇവിടെ പങ്കുവെക്കുന്നത്. ശതകോടികളുടെ നിക്ഷേപം നടത്താറുള്ളതിനാലും ശാസ്ത്രീയമായ സമീപനവും സെക്ടറിനെയും ഓഹരിയേയും ആഴത്തിൽ പഠിച്ചിട്ടുമാകും ഇത്തരം ഇൻസ്റ്റിട്യൂഷണൽ ഇൻവെസ്റ്റേഴ്സ് ഓഹരികളെ തെരഞ്ഞെടുക്കാറുള്ളത്.

അതിനാൽ തന്നെ ഒരു ഓഹരിയിൽ വിദേശ നിക്ഷേപക സ്ഥാപനങ്ങളുടേയും ആഭ്യന്തര നിക്ഷേപക സ്ഥാപനങ്ങളുടെയും പങ്കാളിത്തം വർധിക്കുന്നതിനെ പൊതുവിൽ പോസിറ്റീവ് ഘടകമായാണ് വിലയിരുത്തപ്പെടുന്നത്. സാധാരണക്കാരായ റീട്ടെയിൽ നിക്ഷേപകർക്കും ഇത്തരം ഡേറ്റകൾ ഒരു ചൂണ്ടുപലകയാണ്. ഈയൊരു പശ്ചാത്തലത്തിൽ മാർച്ച് സാമ്പത്തിക പാദത്തിനിടയിൽ ഇൻസ്റ്റിട്യൂഷണൽ ഇൻവെസ്റ്റേഴ്സിന്റെ ഓഹരി പങ്കാളിത്തം വർധിച്ചതും പൊതുമേഖലയിൽ പ്രവർത്തിക്കുന്നതും നിലവിലെ വിപണി വില 50 രൂപ നിലവാരത്തിൽ താഴെയുള്ളതുമായ മൂന്ന് ബാങ്ക് ഓഹരികളുടെ വിശദാംശം നോക്കാം.

യൂക്കോ ബാങ്ക്

രാജ്യത്തെ പൊതുമേഖലയിൽ പ്രവർത്തിക്കുന്ന മുൻനിര വാണിജ്യ ബാങ്കിങ് സ്ഥാപനമാണ് യൂക്കോ ബാങ്ക് ലിമിറ്റഡ് (BSE: 532505, NSE: UCOBANK). കൊൽക്കത്തയാണ് ബാങ്കിന്റെ ആസ്ഥാനം. റീട്ടെയിൽ ബാങ്കിങ്, കോർപറേറ്റ് ബാങ്കിങ് ഉൾപ്പെടെ എല്ലാവിധ ധനകാര്യ സേവനങ്ങളും വാഗ്ദാനം ചെയ്യുന്നു. ഏകദേശം 39,300 കോടി രൂപയാണ് യൂക്കോ ബാങ്കിന്റെ നിലവിലെ വിപണി മൂല്യം. ഒരു പതിറ്റാണ്ടിലേറെ കാലം ബിസിനസ് പ്രകടനത്തിൽ പിന്നാക്കമായിരുന്നെങ്കിലും കേന്ദ്ര സർക്കാരിന്റെ ഇടപെടലുകളെ തുടർന്ന് 2021-നു ശേഷം ഇങ്ങോട്ട് താരതമ്യേന മികച്ച പ്രകനമാണ് യൂക്കോ ബാങ്ക് കാഴ്ചവെക്കുന്നത്. കഴിഞ്ഞ മൂന്ന് വർഷത്തിനിടെ ബാങ്കിന്റെ അറ്റാദായം 126 ശതമാനവും വരുമാനം 15 ശതമാനം നിരക്കിലും സംയോജിത വാർഷിക വളർച്ച കുറിച്ചിട്ടുണ്ട്.

അതേസമയം 90.95 ശതമാനം ഓഹരികളും കേന്ദ്ര സർക്കാരിന്റെ കൈവശമുള്ള ഈ പൊതുമേഖല ബാങ്കിൽ മാർച്ച് സാമ്പത്തിക പാദത്തിനിടെ വിദേശ നിക്ഷേപക സ്ഥാപനങ്ങളും ആഭ്യന്തര നിക്ഷേപക സ്ഥാപനങ്ങളും ഒരുപോലെ പങ്കാളിത്തം വർധിപ്പിച്ചിട്ടുണ്ട്. മാർച്ച് പാദത്തിനിടെ വിദേശ നിക്ഷേപക സ്ഥാപനങ്ങൾ 0.42 ശതമാനവും ആഭ്യന്തര നിക്ഷേപക സ്ഥാപനങ്ങൾ 4.03 ശതമാനം വീതവുമാണ് യൂക്കോ ബാങ്കിലെ ഓഹരി പങ്കാളിത്തം വർധിപ്പിച്ചിരിക്കുന്നത്. നിലവിൽ 31 രൂപ നിലവാരത്തിലാണ് ഈ ബാങ്ക് ഓഹരിയുടെ വ്യാപാരം പുരോഗമിക്കുന്നത്. ഈ വർഷം ഇതുവരെയുള്ള കാലയളവിൽ യൂക്കോ ബാങ്ക് ഓഹരിയുടെ വില 30 ശതമാനത്തോളം താഴേക്കിറങ്ങിയിട്ടുണ്ട്.

പഞ്ചാബ് & സിന്ധ് ബാങ്ക്

ന്യൂ‍ഡൽഹി കേന്ദ്രമാക്കി പൊതുമേഖലയിൽ പ്രവർത്തിക്കുന്ന വാണിജ്യ ബാങ്കിങ് സ്ഥാപനമാണ് പഞ്ചാബ് & സിന്ധ് ബാങ്ക് ലിമിറ്റഡ് (BSE: 533295, NSE: PSB). 1908-ലാണ് ബാങ്കിന്റെ തുടക്കം. മാർച്ച് പാദത്തിനൊടുവിലെ കണക്കുകൾ അനുസരിച്ച് രാജ്യത്തെ 367 ജില്ലകളിലായി 1,610 ശാഖകളും 1,047 എടിഎമ്മുകളും ബാങ്കിന് കീഴിൽ പ്രവർത്തിക്കുന്നുണ്ട്. ഏകദേശം 21,000 കോടി രൂപയാണ് പഞ്ചാബ് & സിന്ധ് ബാങ്കിന്റെ നിലവിലെ വിപണി മൂല്യം. കഴിഞ്ഞ അഞ്ച് വർഷത്തിനിടെ ബാങ്കിന്റെ വരുമാനത്തിൽ ക്രമാനുഗത വളർച്ച രേഖപ്പെടുത്തുന്നുണ്ടെങ്കിലും അറ്റാദായത്തിൽ ഇതിനൊത്ത പ്രകടനം കാണാനില്ല.