സൂര്യവംശിക്ക് കാംബ്ലിയുടെയും ഷായുടെയും അവസ്ഥയുണ്ടാകരുത്; ബിസിസിഐക്ക് മുന്നറിയിപ്പ് നൽകി മുൻ പരിശീലകൻ

ക്രിക്കറ്റ് ലോകത്തെ തന്നെ ഞെട്ടിച്ച രാജസ്ഥാൻ റോയൽസ് താരം വൈഭവ് സൂര്യവംശിയെ കുറിച്ചുള്ള ചർച്ചകൾ ഇതുവരെ അവസാനിച്ചിട്ടില്ല. 35 പന്തിൽ സെഞ്ചുറി നേടി പല റെക്കോഡുകളും സ്വന്തപേരിലേക്ക് മാറ്റി എഴുതിയ താരം ഇതിഹാസങ്ങളുടെ പ്രശംസയും ഏറ്റുവാങ്ങി. രാജസ്ഥാൻ റോയൽസിന്റെ വജ്രായുധമെന്ന് ആരാധകർ വിശേഷിപ്പിക്കുന്ന ഈ പതിനാലുകാരനെ സംരക്ഷിക്കണമെന്ന ആവശ്യവുമായി രംഗത്തെത്തിയിരിക്കുകയാണ് മുൻ ഇന്ത്യൻ പരിശീലകൻ ഗ്രെഗ് ചാപ്പൽ.

വൈഭവ് സൂര്യവംശിയെ സംരക്ഷിക്കണമെന്ന് ഇന്ത്യൻ ക്രിക്കറ്റ് കൺട്രോൾ ബോർഡിന് (ബിസിസിഐ) മുന്നറിയിപ്പ് നൽകിയിരിക്കുകയാണ് മുൻ കോച്ച് ഗ്രെഗ് ചാപ്പൽ.

ഇഎസ്പിഎൻ ക്രിക്കിൻഫോയിലെ തന്റെ പുതിയ കോളത്തിൽ, ഇന്ത്യയിലെ ഏറ്റവും കൂടുതൽ ചർച്ച ചെയ്യപ്പെടുന്ന മൂന്ന് താരങ്ങളായ സച്ചിൻ ടെണ്ടുൽക്കർ, വിനോദ് കാംബ്ലി, പൃഥ്വി ഷാ എന്നിവരുടെ ക്രിക്കറ്റ് യാത്രകളെക്കുറിച്ച് ചാപ്പൽ പറയുന്നുണ്ട്.

“സച്ചിൻ ഒരു കൗമാരക്കാരനെന്ന നിലയിൽ വിജയിച്ചത് കഴിവ് കൊണ്ടല്ല, മറിച്ച് ശക്തമായ ഒരു പിന്തുണാ സംവിധാനം കൊണ്ടായിരുന്നു - ഒരു ഭ്രാന്തൻ സ്വഭാവം, ഒരു ബുദ്ധിമാനായ പരിശീലകൻ, സർക്കസിൽ നിന്ന് അദ്ദേഹത്തെ സംരക്ഷിച്ച ഒരു കുടുംബം. മറുവശത്ത്, തുല്യ കഴിവുള്ളവനും ഒരുപക്ഷേ കൂടുതൽ ആഡംബരപൂർണ്ണനുമായ വിനോദ് കാംബ്ലി, പ്രശസ്തിയും അച്ചടക്കവും സന്തുലിതമാക്കാൻ പാടുപെട്ടു. അദ്ദേഹത്തിന്റെ ഉയർച്ച പോലെ തന്നെ നാടകീയമായിരുന്നു അദ്ദേഹത്തിന്റെ പതനവും. വീണുപോയ മറ്റൊരു താരമാണ് പൃഥ്വി ഷാ, പക്ഷേ ഇനി ഉന്നതിയിലേക്ക് മടങ്ങാൻ സാധ്യതയില്ല,” എന്ന് ഇഎസ്പിഎൻ ക്രിക്കിൻഫോയിൽ ചാപ്പൽ എഴുതി.

ക്രിക്കറ്റ് ലോകം യുവ താരങ്ങളുടെ പിറവിയ്ക്ക് അപരിചിതമല്ല. 16-ാം വയസ്സിൽ അരങ്ങേറ്റം കുറിച്ചതിന് ശേഷം സച്ചിൻ ടെണ്ടുൽക്കർ ക്രിക്കറ്റ് കണ്ട ഏറ്റവും മികച്ച ബാറ്റ്സ്മാനായി മാറിയെങ്കിലും. വിനോദ് കാംബ്ലി, ഷാ എന്നിവരെപ്പോലുള്ള മറ്റുള്ളവർ തിളക്കമാർന്നവരായിരുന്നു, പക്ഷേ വളരെ വേഗം മങ്ങി.

കാംബ്ലി, ഇത്രയധികം കഴിവുള്ള ആളായിരുന്നിട്ടും, അദ്ദേഹത്തിന് അതേ വൈകാരികവും അച്ചടക്കപരവുമായ പിന്തുണ ലഭിച്ചില്ല, ഇത് അദ്ദേഹത്തിന്റെ പ്രശസ്തിയിൽ നിന്ന് പെട്ടെന്ന് താഴെ വീഴാൻ കാരണമായി എന്നും അദ്ദേഹം കൂട്ടിച്ചേർത്തു.

2018-ൽ ഇന്ത്യയെ അണ്ടർ 19 ലോകകപ്പ് കിരീടത്തിലേക്ക് നയിച്ചതും വലിയ പ്രതീക്ഷകളോടെ സീനിയർ ടീമിനായി അരങ്ങേറ്റം കുറിച്ചതുമായ പൃഥ്വി ഷാ, കളിക്കളത്തിന് പുറത്തുള്ള പ്രശ്നങ്ങൾ, ഫിറ്റ്നസ് കുറവുകൾ, മോശം അച്ചടക്കം എന്നിവ കാരണം തന്റെ കരിയറിൽ മങ്ങലേൽപ്പിച്ചു.

വൈഭവ് സൂര്യവംശിയുടെ യഥാർത്ഥ വെല്ലുവിളി അദ്ദേഹത്തിന്റെ കരിയർ പാത കൈകാര്യം ചെയ്യുന്നതിലാണ്. അതുകൊണ്ട് അദ്ദേഹത്തിന് ഒരു ഘടനാപരമായ വികസന പദ്ധതി ഉറപ്പാക്കണമെന്നാണ് ചാപ്പൽ ബിസിസിഐയോട് അഭ്യർത്ഥിച്ചത്. ഇത്രയും ചെറുപ്പത്തിൽ തന്നെ പ്രശസ്തി നേടാൻ സഹായിക്കുന്നതിന് മാനസികാരോഗ്യ പിന്തുണ, മാധ്യമ പരിശീലനം, ഫിറ്റ്നസ് കണ്ടീഷനിങ്, മെന്റർ മാർഗ്ഗനിർദ്ദേശം എന്നിവ പദ്ധതിയിൽ ഉൾപ്പെടുത്തണം എന്നും അദ്ദേഹം പറഞ്ഞു.