പ്ലസ്‌ വൺ പ്രവേശനത്തിന് 14 മുതൽ അപേക്ഷിക്കാം, ട്രയൽ അലോട്ട്‌മെൻ്റ് 24ന്; അപേക്ഷിക്കാൻ ഈ വെബ്സൈറ്റ്

തിരുവനന്തപുരം: സംസ്ഥാനത്ത്‌ പ്ലസ്‌ വൺ പ്രവേശനത്തിനുള്ള അപേക്ഷകൾ ഇന്നുമുതൽ സമർപ്പിക്കാം. ഹയർ സെക്കൻഡറി ഒന്നാംവർഷ പ്രവേശനത്തിനായി ബുധൻ വൈകിട്ട്‌ നാലു മുതലാണ് അപേക്ഷ നൽകാൻ കഴിയുക. പൂർണമായും ഓൺലൈനായാണ്‌ പ്രവേശന നടപടികൾ. പൊതുവിദ്യാഭ്യാസ വകുപ്പിൻ്റെ ഹയർസെക്കണ്ടറി പ്രവേശന വെബ്‌സൈറ്റായ https;//hscap.kerala.gov.in വഴി ഏകജാലകത്തിലൂടെയാണ് അപേക്ഷിക്കേണ്ടത്‌.

പ്ലസ് വൺ പ്രവേശനവുമായി ബന്ധപ്പെട്ട് സംസ്ഥാനത്തെ എല്ലാ ഹൈസ്കൂളിലും ഹയർ സെക്കൻഡറി സ്കൂളിലും ഹെൽപ്‌ ഡെസ്ക്‌ പ്രവർത്തിക്കും. മെയ് 14 മുതൽ 20 വരെയാണ് അപേക്ഷിക്കാൻ കഴിയുക. 24ന്‌ ട്രയൽ അലോട്ട്‌മെൻ്റ് നടക്കും. ജൂൺ രണ്ടിനാണ്‌ ആദ്യ അലോട്ട്‌മെൻ്റ്. 10ന്‌ രണ്ടാം അലോട്ട്‌മെൻ്റും 16ന്‌ മൂന്നാം അലോട്ട്‌മെൻ്റും നടക്കും.

ജൂൺ 18നാണ് ഹയർ സെക്കൻഡറി ഒന്നാംവർഷ ക്ലാസുകൾ ആരംഭിക്കുക. ശേഷം പുതിയ അപേക്ഷകൾ ക്ഷണിച്ച്‌ സപ്ലിമെൻ്ററി അലോട്ട്‌മെൻ്റിലൂടെ ഒഴിവുകൾ നികത്തും. ജൂലൈ 23ന് പ്രവേശന നടപടി അവസാനിക്കും. പട്ടിക ജാതി വികസന വകുപ്പിന് കീഴിലെ ആറ്‌ മോഡൽ റെസിഡൻഷ്യൽ ഹയർ സെക്കൻഡറി സ്കൂകളിലെ പ്രവേശനം ഈ വർഷം മുതൽ ഏകജാലക സംവിധാനത്തിലൂടെയാണ്‌.

ടെക്‌നിക്കല്‍ ഹയര്‍ സെക്കണ്ടറി സ്‌കൂൾ പ്രവേശനം

കേരള സര്‍ക്കാര്‍ സ്ഥാപനമായ ഇന്‍സ്റ്റിറ്റ്യൂട്ട് ഓഫ് ഹ്യൂമന്‍ റിസോഴ്‌സസ് ഡെവലപ്‌മെൻ്റിൻ്റെ നിയന്ത്രണത്തിലുള്ള ടെക്‌നിക്കല്‍ ഹയര്‍ സെക്കണ്ടറി സ്‌കൂളുകളില്‍ 2025-26 അധ്യായനവര്‍ഷത്തില്‍ 11-ാം ക്ലാസിൽ പ്രവേശനത്തിന് അപേക്ഷ ക്ഷണിച്ചു. thss.ihrd.ac.in വെബ്‌സൈറ്റ് മുഖേന മെയ് 12 മുതല്‍ ഓണ്‍ലൈന്‍ ആയും അതത് സ്‌കൂളുകളില്‍ നേരിട്ടെത്തി ഓഫ് ലൈന്‍ ആയും അപേക്ഷ സമര്‍പ്പിക്കാം.

ഓണ്‍ലൈന്‍ മുഖേന അപേക്ഷകള്‍ സ്വീകരിക്കുന്ന അവസാന തീയതി മെയ് 27 വൈകിട്ട് 5 മണിയാണ്. രജിസ്‌ട്രേഷന്‍ ഫീസായ 110 രൂപ (എസ്.സി/എസ്.ടി വിദ്യാര്‍ഥികള്‍ക്ക് 55 രൂപ) ഓണ്‍ലൈനായി അതത് സ്‌കൂളുകളുടെ ബാങ്ക് അക്കൗണ്ട് മുഖേനയും സ്‌കൂള്‍ ക്യാഷ് കൗണ്ടറില്‍ നേരിട്ടും അടയ്ക്കാം. ഓണ്‍ലൈനായി അപേക്ഷിക്കുന്നവര്‍ക്കു രജിസ്‌ട്രേഷന്‍ ഫീസ് അടച്ചതിന് ശേഷം രജിസ്ട്രഷേന്‍ ഫീസ് അടച്ചതിൻ്റെ വിശദവിവരങ്ങള്‍ thss.ihrd.ac.in എന്ന ഓണ്‍ലൈന്‍ ലിങ്കില്‍ നല്‍കേണ്ടതാണ്.

ഓഫ് ലൈനായി അപേക്ഷിക്കുന്നവര്‍ അപേക്ഷയും അനുബന്ധരേഖകളും രജിസ്‌ട്രേഷന്‍ ഫീസും സഹിതം (രജിസ്‌ട്രേഷന്‍ ഫീസ് അതത് പ്രിന്‍സിപ്പാള്‍മാരുടെ പേരിലെടുത്ത ഡിമാന്റ് ഡ്രാഫ്റ്റായും സ്‌കൂള്‍ ക്യാഷ് കൗണ്ടറിലും അടയ്ക്കാവുന്നതാണ്) മെയ് 28 ന് വൈകുന്നേരം 4 ന് മുമ്പായി ബന്ധപ്പെട്ട സ്‌കൂളുകളില്‍ സമര്‍പ്പിക്കണം.