പ്ലസ് വണ്‍ സ്‌പോര്‍ട്സ് ക്വാട്ട ഓണ്‍ലൈന്‍ രജിസ്‌ട്രേഷന്‍ 23 മുതല്‍; പരിഗണിക്കുക ഈ കാലയളവിലെ സർട്ടിഫിക്കറ്റുകൾ മാത്രം

• 2025-26 അധ്യയന വര്‍ഷത്തെ പ്ലസ് വണ്‍ സ്‌പോര്‍ട്സ് ക്വാട്ട ഓണ്‍ലൈന്‍ രജിസ്‌ട്രേഷന്‍ മെയ് 23ന് ആരംഭിക്കും.
• 2023 ഏപ്രിൽ ഒന്നു മുതല്‍ 2025 മാര്‍ച്ച് 31 വരെയുള്ള സര്‍ട്ടിഫിക്കറ്റുകള്‍ മാത്രമാണ് സ്‌പോര്‍ട്സ് ക്വാട്ടയിൽ പരിഗണിക്കുക.
• ഹയർ സെക്കൻഡറി വിഭാഗത്തിൽ 77.81 ശതമാനമാണ് വിജയശതമാനം

തിരുവനന്തപുരം: 2025-26 അധ്യയന വര്‍ഷത്തെ പ്ലസ് വണ്‍ സ്‌പോര്‍ട്സ് ക്വാട്ട ഓണ്‍ ലൈന്‍ രജിസ്‌ട്രേഷന്‍ മെയ് 23ന് ആരംഭിക്കും. 2023 ഏപ്രില്‍ ഒന്നു മുതല്‍ 2025 മാര്‍ച്ച് 31 വരെയുള്ള സര്‍ട്ടിഫിക്കറ്റുകളാണ് സ്‌പോര്‍ട്സ് ക്വാട്ടയ്ക്ക് പരിഗണിക്കുക. വിദ്യാര്‍ഥികള്‍ വിദ്യാഭ്യാസ വകുപ്പിന്റെ HSCAP GATE WAY എന്ന ഏകജാലക സംവിധാനത്തിലൂടെ അപേക്ഷ നല്‍കി സ്‌പോര്‍ട്‌സ് സര്‍ട്ടിഫിക്കറ്റുകള്‍ alpydsc2025@gmail.com എന്ന ജില്ലാ സ്‌പോര്‍ട്സ് കൗണ്‍സിലിന്റെ മെയില്‍ ഐഡിയിലേയ്ക്ക് അയക്കണം.

സ്‌പോര്‍ട്സ് അച്ചീവ്‌മെന്റ് പ്രിന്റ് ഔട്ട്, ഒറിജിനല്‍ സര്‍ട്ടിഫിക്കറ്റിന്റെ പകര്‍പ്പ് (അസ്സോസിയേഷന്‍ മത്സരങ്ങളുടെ സര്‍ട്ടിഫിക്കറ്റില്‍ ഒബ്സര്‍വ്വര്‍ സീലും ഒപ്പും ഉള്‍പ്പെടെ) എന്നിവ സഹിതം വെരിഫിക്കേഷന് ജില്ലാ സ്‌പോര്‍ട്സ് കൗണ്‍സിലില്‍ മേയ് 24 മുതല്‍ 28ന് വൈകുന്നേരം 5 മണി വരെ നേരിട്ട് എത്തേണ്ടതാണ്. സര്‍ട്ടിഫിക്കറ്റ് വെരിഫിക്കേഷന്‍ നടത്തി സ്‌കോര്‍ കാര്‍ഡ് നേരിട്ട് നല്‍കുന്നതാണ്. സ്‌കോര്‍ കാര്‍ഡ് ലഭിച്ച ശേഷം വീണ്ടും HSCAP GATE WAY എന്ന സൈറ്റില്‍ സ്‌പോര്‍ട്സ് ക്വാട്ട ഓണ്‍ലൈന്‍ ആപ്ലിക്കേഷന്‍ മേയ് 29 ന് മുമ്പായി നല്‍കണം.

സ്‌പോര്‍ട്‌സ് പ്രവേശനത്തിന് നല്‍കുന്ന സര്‍ട്ടിഫിക്കറ്റുകളില്‍ സീരിയല്‍ നമ്പര്‍, ഇഷ്യൂ ചെയ്ത തീയതി, ഇഷ്യുയിംഗ് അതോറിറ്റി, എന്നിവ നിര്‍ബന്ധമായും ഉണ്ടായിരിക്കേണ്ടതാണ്. ഇല്ലാത്ത പക്ഷം അതിന്റെ പൂര്‍ണ്ണ ഉത്തരവാദിത്വം അതത് അതോറിറ്റിക്കും അപേക്ഷ സമര്‍പ്പിക്കുന്ന വിദ്യാര്‍ഥികള്‍ക്കുമായിരിക്കുമെന്നുള്ള സത്യവാങ്മൂലം ഇതോടൊപ്പം വെക്കണം.

അതെസമയം ഇത്തവണ ഹയർ സെക്കൻഡറി വിഭാഗത്തിൽ 77.81 ശതമാനമാണ്‌ വിജയശതമാനം. വൊക്കേഷണൽ ഹയർ സെക്കൻഡറി വിഭാഗത്തിൽ 70.06ഉം. ഹയർ സെക്കൻഡറി വിഭാഗത്തിൽ സംസ്ഥാനത്തെ ആകെ 57 സ്‌കൂളുകൾ 100 ശതമാനം വിജയം കൈവരിച്ചു. എറണാകുളം ജില്ലയാണ്‌ ഏറ്റവും കൂടുതൽ വിജയ ശതമാനം കൈവരിച്ചത്‌ (83.09). ഏറ്റവും കുറവ്‌ വിജയ ശതമാനം കാസർകോടും രേഖപ്പെടുത്തി (71.09). എല്ലാ വിഷയങ്ങള്‍ക്കും 30,145 വിദ്യാർഥികളാണ്‌ ഹയർ സെക്കൻഡറി വിഭാഗത്തിൽ എ പ്ലസ്‌ നേടിയത്‌.

കഴിഞ്ഞ വർഷത്തെക്കാൾ കുറവാണ് ഇത്തവണത്തെ വിജയശതമാനം. 78.69 ശതമാനമായിരുന്നു കഴിഞ്ഞ വർഷത്തെ വിജയം.

മെയ്‌ 27 വരെ സേ/ ഇംപ്രൂവ്മെന്റ് പരീക്ഷയ്ക്ക് അപേക്ഷിക്കാൻ കഴിയും. മെയ്‌ 29 വരെ ഫൈനോടുകൂടി അപേക്ഷ നൽകാം. ജൂണ്‍ 23 മുതല്‍ 27 വരെ തീയതികളിലായാണ്‌ പരീക്ഷ നടത്തുക. പുനര്‍മൂല്യനിര്‍ണ്ണയം, ഫോട്ടോകോപ്പി, സൂക്ഷ്മപരിശോധന എന്നിവയ്ക്ക് അപേക്ഷിക്കാനുള്ള അവസാന തീയതി മെയ്‌ 27 ആണ്‌.