കുട്ടികൾ പാടിയത് തീവ്രവാദ ഗാനം ഒന്നും അല്ലല്ലോ?. സംഗീതത്തിന് ജാതിയില്ല, മതമില്ല. വിവാദമൊന്നും കണക്കിലെടുക്കേണ്ടതില്ല. അത് കുട്ടികളുടെ ആഘോഷമായിരുന്നു: സുരേഷ് ഗോപി

കൊച്ചി: വന്ദേഭാരത് എക്‌സ്പ്രസിന്റെഉദ്ഘാടനച്ചടങ്ങിൽ ഗണഗീതം പാടിയതിനെ ന്യായീകരിച്ച് കേന്ദ്രമന്ത്രി സുരേഷ് ഗോപി. കുട്ടികൾ പാടിയത് തീവ്രവാദ ഗാനം ഒന്നും അല്ലല്ലോയെന്ന് സുരേഷ് ഗോപി ചോദിച്ചു.ഇതുമായി ബന്ധപ്പെട്ട വിവാദമൊന്നും കണക്കിലെടുക്കേണ്ടതില്ല. അത് കുട്ടികളുടെ ആഘോഷമായിരുന്നു. ആ കുഞ്ഞുങ്ങൾ നിഷ്കളങ്കമായി പാടിയതാണ്. അവർക്ക് തോന്നിയ ഗാനം ആലപിക്കുകയാണ് ചെയ്‌തതെന്ന് കേന്ദ്രമന്ത്രി സുരേഷ് ഗോപി പറഞ്ഞു.

കുട്ടികളെ പഠിപ്പിച്ചു എന്നൊക്കെയുള്ള ആരോപണങ്ങൾ അവർ കയ്യിൽ വെച്ചേക്കുക. സംഗീതത്തിന് ജാതിയില്ല, മതമില്ല, ഭാഷയില്ല, ഒരു പുണ്ണാക്കുമില്ല. സംഗീതമെന്നത് ആസ്വദിക്കാൻ പറ്റണം.അങ്ങനെയുള്ള സംഗീതത്തിന് നിങ്ങൾ അവാർഡ് വരെ കൊടുക്കുന്നില്ലേ. അതൊന്നും ചെയ്തില്ലല്ലോ. സംഗീതം ആസ്വദിക്കാൻ കഴിഞ്ഞില്ലെങ്കിൽ കാത് തിരിക്കൂ, ഹൃദയം തിരിക്കൂ, മുഖം തിരിക്കൂ, എന്തു വേണമെങ്കിലും തിരിക്കൂ. അത്രയേയുള്ളൂ. കുഞ്ഞുങ്ങൾ അവരുടെ സന്തോഷം ആഘോഷിക്കുകയാണ് ചെയ്തത്.ആ കുട്ടികളുടെ മനസ്സിലേക്ക് വിമർശിക്കുന്നവരാണ് വിഷം കുത്തിവെക്കുന്നത്. മറ്റു ചിന്തകൾ കുത്തിക്കയറ്റുന്നത്. അതു നിർത്തണം. വിമർശനം ഉന്നയിക്കുന്നവർ ധൈര്യമുണ്ടെങ്കിൽ തന്റെയൊപ്പം രണ്ടു കോളനികളിലേക്ക് വരണമെന്ന് സുരേഷ് ഗോപി വെല്ലുവിളിച്ചു.

മോഡേൺ കോളനി, പാടൂക്കാട് കോളനി. എന്താണ് നിങ്ങൾ പട്ടിക വിഭാഗക്കാരോടും കുമ്പാരികളോടും ചെയ്തുകൊണ്ടിരിക്കുന്ന വഞ്ചന അല്ലെങ്കിൽ തരം എന്നു കാണാം. അതാണ് അഡ്രസ് ചെയ്യേണ്ടത്, അല്ലാതെ ഗണഗീതമല്ലെന്ന് കേന്ദ്രമന്ത്രി സുരേഷ് ഗോപി പറഞ്ഞു.