മരിക്കുന്നതിനു മുന്നേ അമ്മയെ ഞാൻ നാട്ടുമരങ്ങളുടെ വിത്തുകൾ കൊണ്ട് തൂക്കം ചെയ്‌തു. അമ്മയുടെ മരണശേഷം മഹാരാഷ്ട്രയിൽ എല്ലാം അത് നട്ടു, ഇന്ന് പൂക്കളും പഴങ്ങളും പക്ഷികളും കൊണ്ട് അയ്യായിരത്തോളം വലിയ മരങ്ങളുണ്ട്,അതെല്ലാം കാണുമ്പോൾ അമ്മ എൻ്റെ കൂടെ ഉള്ളതായി തോന്നും.

സിനിമകളിൽ കൊടും വില്ലനായി നമ്മളെ വിറപ്പിച്ചിട്ടുള്ള സയാജി ഷിൻഡെ എന്ന നടനെ നമുക്കെല്ലാവർക്കും അറിയാം. എന്നാൽ സ്ക്രീനിലെ വില്ലൻ ജീവിതത്തിൽ ഒരു വലിയ ഹീറോ ആണെന്ന് അധികം ആർക്കും അറിയില്ല. പ്രകൃതിയോട് അത്രമേൽ സ്നേഹമുള്ള ഒരു പച്ച മനുഷ്യനാണ് അദ്ദേഹം.

അമ്മ മരിക്കുന്നതിന് തൊട്ടുമുമ്പ് അദ്ദേഹം അമ്മയെ നാട്ടുമാരങ്ങളുടെ വിത്തുകൾ കൊണ്ട് തുലാഭാരം നടത്തിയിരുന്നു. അമ്മയുടെ വിയോഗശേഷം, ആ വിത്തുകളെല്ലാം അദ്ദേഹം പാകി മുളപ്പിച്ചു. മഹാരാഷ്ട്രയിലെ വരണ്ട ഭൂമിയിൽ അവ നട്ടുപിടിപ്പിച്ചു. ഇന്ന് ആ വിത്തുകൾ വളർന്ന് പൂക്കളും പഴങ്ങളും കിളികളുമായി വലിയൊരു വനമായി മാറിയിരിക്കുന്നു. "ആ മരങ്ങൾ കാണുമ്പോൾ അമ്മ എന്റെ കൂടെയുള്ളതായി എനിക്ക് തോന്നും" എന്നാണ് അദ്ദേഹം വികാരഭരിതനായി പറയുന്നത്.

എന്നാൽ ഈ സ്നേഹം അവിടെ മാത്രം ഒതുങ്ങിയില്ല. 'സഹ്യാദ്രി ദേവറായ്' എന്ന സംഘടനയിലൂടെ മഹാരാഷ്ട്രയിലുടനീളം ഏഴ് ലക്ഷത്തിലധികം നാട്ടുമാരങ്ങളാണ് അദ്ദേഹം വെച്ചുപിടിപ്പിച്ചത്. വെറുതെ മരങ്ങൾ നടുക മാത്രമല്ല, അവയെ സ്വന്തം മക്കളെപ്പോലെ പരിപാലിക്കാനും അദ്ദേഹം സമയം കണ്ടെത്തുന്നു. അന്യസംസ്ഥാന മരങ്ങൾക്ക് പകരം നമ്മുടെ മണ്ണിന് ഇണങ്ങുന്ന നാട്ടുമാരങ്ങൾ വെച്ചുപിടിപ്പിക്കാനാണ് അദ്ദേഹം എപ്പോഴും ശ്രമിക്കുന്നത്. പെറ്റമ്മ കഴിഞ്ഞാൽ പിന്നെ നിസ്വാർത്ഥമായി നമുക്ക് എല്ലാം തരുന്നത് മരങ്ങളാണെന്നാണ് അദ്ദേഹത്തിന്റെ വിശ്വാസം. വരും തലമുറയ്ക്ക് വേണ്ടി തണലൊരുക്കുന്ന സയാജി ഷിൻഡെ എന്ന മനുഷ്യൻ സിനിമാക്കഥകളെക്കാൾ വലിയൊരു മാതൃകയാണ് നമുക്ക് നൽകുന്നത്.