നിപ: ഈ അഞ്ച് കാര്യങ്ങൾ കൃത്യമായി പാലിക്കണം, നിർദേശവുമായി ആരോഗ്യ മന്ത്രി വീണാ ജോര്ജ്
മലപ്പുറം നിപ വൈറസ് കേസിൽ 166 പേരാണ് സമ്പർക്കപ്പട്ടികയിലുള്ളത്. ഇതിൽ 65 പേരാണ് ഹൈ റിസ്കിൽ ഉള്ളത്. മാർഗനിർദേശങ്ങൾ കൃത്യമായി പാലിക്കണമെന്ന് മന്ത്രി.
ഹൈലൈറ്റ്:
- മലപ്പുറം നിപ വൈറസ് ബാധ
- മാര്ഗനിര്ദേശങ്ങള് കൃത്യമായി പാലിക്കണം
- മുന്നറിയിപ്പുമായി ആരോഗ്യ മന്ത്രി
കൊച്ചി: മലപ്പുറം നിപ വൈറസ് ബാധയുടെ പശ്ചാത്തലത്തിൽ സുപ്രധാന നിർദേശവുമായി ആരോഗ്യ മന്ത്രി വീണാ ജോർജ്. സമ്പര്ക്കപ്പട്ടികയിലുള്ളവര് ഐസൊലേഷന് മാര്ഗനിര്ദേശങ്ങള് കൃത്യമായി പാലിക്കണം. പരിശോധനാ ഫലം നെഗറ്റീവ് ആയാലും 21 ദിവസം ഐസൊലേഷനില് തന്നെ തുടരണമെന്നും മന്ത്രി അറിയിച്ചു.
മലപ്പുറം ജില്ലയില് നിപ ബാധയുമായി ബന്ധപ്പെട്ട് പുതുതായി ആരും സമ്പര്ക്കപ്പട്ടികയില് ഉള്പ്പെട്ടിട്ടില്ല. 65 പേര് ഹൈ റിസ്കിലും 101 പേര് ലോ റിസ്കിലുമാണുള്ളത്. നിപ സ്ഥിരീകരിച്ചിട്ടുള്ളയാള് മാത്രമാണ് ഐസിയുവില് ചികിത്സയിലുള്ളത്. സമ്പര്ക്കപ്പട്ടികയിലുള്ള ഒരാള് മാത്രമാണ് ഐസൊലേഷനില് ചികിത്സയിലുള്ളത്.
നിപ ബാധിച്ച രോഗി ഗുരുതരമായി തുടരുകയാണ്. ഹൈറിസ്ക് പട്ടികയിലുള്ള 11 പേര്ക്ക് ആൻ്റി വൈറസ് പ്രൊഫൈലാക്സിസ് ചികിത്സ നല്കി വരുന്നു. ഫീവര് സര്വൈലന്സിൻ്റെ ഭാഗമായി നിശ്ചയിച്ച മുഴുവന് വീടുകളും (4749) സന്ദര്ശിച്ചു.
പുതുതായി കേസ് റിപ്പോര്ട്ട് ചെയ്തിട്ടില്ലെങ്കിലും ഒരു തരത്തിലുള്ള വിട്ടുവീഴ്ചയും പാടില്ലെന്ന് മന്ത്രി നിര്ദേശം നല്കി. നിപ അന്താരാഷ്ട്ര തലത്തില് തന്നെ പൊതുജനാരോഗ്യ മുന്ഗണനായുള്ളതും ദേശീയ/സംസ്ഥാന പ്രോട്ടോകോളുകള് നിലവിലുള്ളതുമായ അണുബാധയാണ്. അതുകൊണ്ട് തന്നെ മാര്ഗനിര്ദേശങ്ങള് കൃത്യമായി പാലിക്കണം
- നിപ സമ്പര്ക്കപ്പട്ടികയിലുള്ളവരുടെ പരിശോധനാഫലം നെഗറ്റീവാണെങ്കിലും 21 ദിവസം നിര്ബന്ധമായും ഐസൊലേഷനില്/ക്വാറന്റൈനില് തന്നെ തുടരണം.
- 21 ദിവസം പൂര്ണമായും യാത്ര ഒഴിവാക്കണം.
- മറ്റുള്ളവരുമായി സമ്പര്ക്കത്തില് വരരുത്.
- എന്തെങ്കിലും രോഗ ലക്ഷണങ്ങള് ഉണ്ടെങ്കില് ആരോഗ്യ പ്രവര്ത്തകരെ വിവരം അറിയിക്കണം.
- ഐസൊലേഷന് മാര്ഗനിര്ദേശങ്ങള് ലംഘിക്കുന്നവര്ക്കെതിരെ കര്ശന നടപടി സ്വീകരിക്കുന്നതാണ്.
166 പേര് സമ്പര്ക്കപ്പട്ടികയില്
മലപ്പുറം ജില്ലയില് നിപ ബാധിച്ച രോഗിയുടെ സമ്പര്ക്കപ്പട്ടികയില് ഉള്പ്പെട്ട 7 പേരുടെ പരിശോധനാ ഫലം കൂടി നെഗറ്റീവായിരുന്നു. ഇതോടെ 56 പേരുടെ പരിശോധനാ ഫലം നെഗറ്റീവായി. ഇതോടെ ആകെ 166 പേരാണ് സമ്പര്ക്കപ്പട്ടികയിലുള്ളത്. 65 പേര് ഹൈ റിസ്കിലും 101 പേര് ലോ റിസ്കിലുമാണുള്ളത്. മലപ്പുറം 119, പാലക്കാട് 39, കോഴിക്കോട് 3, എറണാകുളം, ഇടുക്കി, തിരുവനന്തപുരം, തൃശൂര്, കണ്ണൂര് ഒന്ന് വീതം പേര് എന്നിങ്ങനെയാണ് സമ്പര്ക്കപ്പട്ടികയിലുള്ളത്. നിലവില് ഒരാള്ക്കാണ് നിപ സ്ഥിരീകരിച്ചിട്ടുള്ളത്. 6 പേര് ചികിത്സയിലുണ്ട്. ഒരാള് ഐസിയുവില് ചികിത്സയിലാണ്.
What's Your Reaction?
Like
0
Dislike
0
Love
0
Funny
0
Angry
0
Sad
0
Wow
0
