ഭക്ഷണത്തിന് അമിതവില ഈടാക്കിയോ? ട്രെയിൻ യാത്രക്കാർ ഉറപ്പായും അറിഞ്ഞിരിക്കേണ്ട കാര്യങ്ങൾ

ട്രെയിൻ യാത്രകളിൽ കൂടുതൽ ആളുകളും നേരിടുന്ന ഏറ്റവും വലിയ പ്രശ്നമാണ് ഭക്ഷണങ്ങൾക്ക് ഈടാക്കുന്ന അമിതവില. പലപ്പോഴും ദീർഘദൂരം യാത്ര ചെയ്യുന്നവരായിരിക്കും ഈ പ്രശ്നം കൂടുതലും നേരിടുന്നത്. പുറത്തുനിന്ന് ഭക്ഷണം വാങ്ങുന്നതിനേക്കാൾ കൂടുതൽപേരും ട്രെയിനിൽ കൊണ്ടുവരുന്ന ഭക്ഷണം വാങ്ങാൻ നിർബന്ധിതരാകാറുണ്ട്. എന്നാൽ നിശ്ചിത തുകയെക്കാൾ ഉയർന്ന തുക കച്ചവടക്കാർ വാങ്ങുകയാണ് പതിവ്. ഇത് മിക്കപ്പോഴും വാക്കുതർക്കത്തിലെത്താറുണ്ടെങ്കിലും ആരും പരാതിയുമായി മുന്നോട്ട് പോകാറില്ല. വേറെ വഴി ഇല്ലാത്തതിനാൽ അമിതവിലയ്ക്ക് ഭക്ഷണം വാങ്ങി കഴിക്കുകയാണ് പതിവ്.

ചിലർക്ക് ഇത്തരം സാഹചര്യങ്ങളിൽ, എന്തുചെയ്യണമെന്നോ എവിടെ പരാതിപ്പെടണമെന്നോ പലപ്പോഴും അറിയില്ല. നിങ്ങൾ ഈ പ്രശ്നം നേരിട്ടിട്ടുണ്ടെങ്കിൽ, വിഷമിക്കേണ്ട കാര്യമില്ല. യാത്രക്കാരുടെ അവകാശങ്ങൾ സംരക്ഷിക്കുന്നതിന് ഇന്ത്യൻ റെയിൽവേയും ഇന്ത്യൻ റെയിൽവേ കാറ്ററിംഗ് ആൻഡ് ടൂറിസം കോർപ്പറേഷനും (ഐആർസിടിസി) വ്യക്തമായ നിയമങ്ങൾ ഏർപ്പെടുത്തിയിട്ടുണ്ട്. ഈ നിയമങ്ങൾ അറിയുന്നത് അമിത നിരക്ക് ഈടാക്കുന്നത് ഒഴിവാക്കാനും ആവശ്യമുള്ളപ്പോൾ നടപടിയെടുക്കാനും നിങ്ങളെ സഹായിക്കും.ഐആർസിടിസി മാർഗ്ഗനിർദ്ദേശങ്ങൾ അനുസരിച്ച്, ട്രെയിനുകളിലെ എല്ലാ ഭക്ഷണപാനീയങ്ങളും നിശ്ചിതവും അംഗീകൃതവുമായ നിരക്കിൽ വിൽക്കണമെന്നാണ്. മെനുവിൽ സൂചിപ്പിച്ചിരിക്കുന്ന വിലയേക്കാൾ കൂടുതൽ ഈടാക്കാൻ വിൽപ്പനക്കാർക്ക് അനുവാദമില്ല. ഏതെങ്കിലും വിൽപ്പനക്കാരൻ അധിക പണം ആവശ്യപ്പെട്ടാൽ, അത് നിയമലംഘനമാണ്.